Читайте также
15:00
Бүгін медициналық мекемелерде ашық есік күні өтіп жатыр
Оставить комментарий
4 ақпан - дүниежүзілік онкологияға қарсы күрес күн. Осыған орай бүгін республика бойынша барлық медициналық ұйымдарда ашық есік күндері өтіп жатыр.
Шығыс өңірінде де облыстық көпсалалы онкология және хирургия орталығы мен облыстағы барлық емханалар бүгін пациенттерді қабылдады. Бұл күні келушілерді онколог мамандар тексеріп, кеңестерін берді, деп хабарлайды Altainews.kz тілшісі.
Күн сенбі болғанына қарамастан облыстық көпсалалы онкология және хирургия орталығы сағат тоғыздан бастап алғашқы пациенттерін қабылдай бастады. Тоқсары түсті шарлармен безендірілген фойеде келушілерді қарсы алған медицина қызметкерлері оларға қалай қызмет көрсетілетінін түсіндіріп, бағыт-бағдар беріп тұрды.
- Бүгін біздің орталықта онкологияға қарсы дүниежүзілік күрес күні аясында, обыр дертінің алдын алу мақсатында осы шара ұйымдастырылды. Егер обыр дерті дер кезінде анықталса, ол толығымен емделеді. Біз тұрғындарға соны түсіндіргіміз келеді. Онкологиядан қорықпау керек, скринингтік тексерулерден уақтылы өткен дұрыс, ол үшін мемлекет тарапынан әртүрлі бағдарламалар қарастырылған. Бүгін орталыққа 300-ден астам адам келіп, мамандардың кеңесін алды, - деді көпсалалы онкология және хирургия орталығы клиника-диагностикалық бөлімшесі басшысының м.а. Шолпан Нұрғалиева.
Шолпан Нұрғалиеваның айтуынша, облыста онкология дерті бойынша 14 мыңнан астам науқас есепте тұр, биыл 2500 жаңа жағдай тіркелген. Дерттің ерте кезде анықталуы бүгінгідей ашық есік күні мен скринингтік тексерулердің нәтижесінде мүмкін болып отыр.
Өскемендік Ернар Қабыланов жетпіс жастағы анасын тексеруге әкеліпті.
- Мен бес күн жұмыс істеймін, бүгін сенбі күні қабылдап жатқандары тамаша болды. Анамды мамандарға қаратуға алып келдім. Осындай шаралар жиі өткізіліп тұрса екен. Өте ризамыз, - дейді Ернар.
Өскеменнің тағы бір тұрғыны Динара Лазимканова скринингтік тексерулерден өтуге жұмыстан шыға алмайтынын, бүгін осы мүмкіндікті пайдаланып қалу үшін сағат тоғыздан келгенін айтты.
- Барлық мамандардың қабылдап жатқаны қуантты, бір күнде барлығынан өтіп алсам деп келдім, - дейді тұрғын.
Хирург-онколог Архат Қамзанов науқастарды тек қабылдап қана қоймай, олар көрсетілімдері бойынш УЗД, КТ зерттеулерінен өткенін айтты.
- Тұрғындар үшін өте қолайлы деп ойлаймын. Біріншіден, келушілерде дәрігерлердің жолдамасынсыз, міндетті медициналық сақтандыру жүйесіндегі мәртебесіне қарамастан тексерілді. Екіншіден, бір бейінді ғана емес, барлық бағыттағы мамандар қабылдады. Оның үстіне қандай да бір күдік туған кезде пациенттерді УЗД, КТ зерттеулерінен өткізу мүмкіндігі болды, - деді хирург-онколог.
Естеріңізге сала кетейік, облыстық көпсалалы онкология және хирургия орталығында ашық есік күні ай сайын ұйымдастырылады. Өткен жылы орталық он төрт рет ашық есік күнін өткізіпті.
