Катонқарағай жаңа ритмге көшті

Биыл Катонқарағай ауданында маңызды өзгеріс орын алды – 40 мемлекеттік және әлеуметтік мекеме жаңа кесте бойынша жұмыс істеуге көшті. Жаңа жұмыс тәртібіне сәйкес, қызметкерлердің жұмыс күні таңғы сағат 08:00-де басталып, 17:30-да аяқталады. Түскі үзіліс уақыты да өзгеріп, 12:00-ден 13:30-ға белгіленді. Бұл - аймақ үшін жаңа стандартты орнататын пилоттық жоба.

Желтоқсан айында өңірлік басқармалардың басшылары ауданға арнайы сапармен барып, 18 ауылдың тұрғындарымен жаңа бастаманы талқылады. Кездесулер барысында тұрғындардың басым бөлігі бұл өзгерісті қолдап, оң көзқарас танытты.

Қаңтар айынан бастап пилоттық режимде енгізілген бұл жүйенің тиімділігі алдағы уақытта бағаланбақ. Егер оң нәтижесін көрсетсе, жаңа кесте тұрақты негізде бекітілуі мүмкін. Аудан басшылығы тұрғындардың өзгеріске бейімделу үдерісін мұқият бақылап, алғашқы нәтижелерді сараптауға әзір екенін жеткізді.

Катонқарағай ауданының әкімі Данияр Дюсембаев жаңа жұмыс тәртібі туралы өз ойын білдірді:

«Халықтың сұранысы бойынша, қаңтар айынан бастап жұмыс уақытын бір сағат алдыға жылжыттық. Бұл бастама аймақ тұрғындарының өмір сүру сапасын арттыруға оң әсер етеді деп сенеміз».

Қазіргі таңда жаңа жұмыс кестесі тек пилоттық режимде жүзеге асырылып жатыр. Егер бұл бастама өз тиімділігін дәлелдесе, оны басқа аймақтар да енгізуі мүмкін. Жаңа жүйенің болашағы уақыт еншісінде.